本文重點
絲絲平時見唔少上市公司老闆配股「抽水」，甚至拎股票抵押借錢，尋日上港交所（00388）網站睇公告，罕有見到有間公司大股東好有「義氣」，抵押自己股份幫公司借錢，講緊係恒鼎（01393）「焦炭王子」鮮揚。
配合下半年發展
恒鼎尋日公布大股東鮮揚抵押持有嘅2億股股份，幫公司借咗一筆1.3億美元（約10.14億港元）嘅6個月貸款，固定年息2.1厘。若用恒鼎今年收市價8.29元計，呢2億股約值16.58億元，即係話個貸款折讓咗38.8%。
絲絲問過相熟嘅銀行界人士，佢哋話除非係大型藍籌股，否則近期上市公司一般做嘅銀團貸款年息都要1.6厘以上，如果以恒鼎呢類上市只有兩、三年，派息唔多嘅公司，今次貸款應該幫公司慳番唔少利息支出。
早排恒鼎喺中期業績已講過下半年要做多啲煤礦收購，有老友話鮮揚今次幫公司借錢，就係要配合公司下半年發展，呢位「王子」果然係「義氣仔女」！
余絲韻