渣打香港環球市場部有喬遷之喜，因為聽日佢哋就會正式搬入國金中心，渣打香港東北亞區環球市場地區主管彭達賢大讚新地方開揚闊落，仲話會繼續搵地方擴張，睇嚟佢哋環球市場業務真係好景，因為大中華區收入按年增長逾30%，仲話會持續有強勁增長！
彭達賢大讚夠闊落
國金就梗係正啦，否則金管局同四叔都唔會留番幾層自己用，彭達賢去咗新辦公室，話最開心就係地方闊落，可以將成班同事擺喺同一層，有乜嘢都可以面對面講，唔使好似以前分幾層咁，一係就打內線，一係就跑上跑落。國金又高又有海景，亦係彭達賢大讚嘅原因之一，佢仲話女同事向佢反映，話個洗手間靚到不得了，照咁睇女同事補妝時就更加心花怒放啦。
余絲韻