本文重點
向來為恒隆地產（00101）董事長陳啟宗引以為傲嘅豪宅君臨天下，早前賣個「滿堂紅」，就連公司董事總經理袁偉良及執行董事高伯遒都唔執輸，各自買入兩個單位，共涉資8,457萬元，帶挈恒隆地產賺咗6,200萬元收益，果真「肥水不流別人田」。
不過，公司強調今次並無明益佢哋，因為代價與向第三方出售其他單位嘅出售價相同，完全公平合理，符合小股東嘅利益。
買價與街客一樣
不過，尋日絲絲睇恒隆地產嘅通告，曾經發生小插曲，事緣喺通告嘅摘要中，寫明今次袁偉良及高伯遒係與作為賣方嘅港鐵（00066）簽訂買賣協議，絲絲即刻諗恒隆早前與港鐵就君臨天下分樓各自推售，身為恒隆高層，無理由唔幫襯自己公司而幫襯港鐵啫。
原來只係一場誤會，睇埋通告詳細內容，原來港鐵只係代表恒隆地產旗下全資附屬公司AP World Limited作為賣方簽約，恒隆地產集團傳訊高級經理阿May話呢啲係一啲技術上手續，兩大高層當然係幫襯自己公司，如果唔係公司都唔使發出關連交易嘅通告啦。
以前恒隆不斷讚君臨天下點好，大家或以為係「賣花讚花香」，但依家連公司高層都掃貨，相信為唔少買家派咗定心丸。然而今次通告連兩位高層買咗邊個單位都寫得一清二楚，會唔會唔係太方便？可惜絲絲無乜機會見到佢哋兩位，否則問吓佢哋買嚟自住定係投資都好喎！
余絲韻