現貨場成交額只有552億元，股仔無晒動靜，缸邊友唔願入場。期貨場在結算前夕兩個月成交合約增至逾13萬套，不過未平倉合約唔見顯著增加，期貨場近呢兩個月愈玩愈縮水。

大笨象（00005）升0.8%，報收84.7元；祖國移動（00941）亦反彈，盤中曾見79.6元，可惜散場報收78.8元，僅升1粒神。祖國野獸（02628）派完成績表後，獲大行唱好，刺激股價升逾3%，報收34.3元，走勢大勇。思捷（00330）散場後先派成績表，但偷步被買起，股價升3.1%，報收59.9元，以一個馬鼻跑贏祖國野獸，成為大隻佬升幅冠軍。

股仔無鑊氣要執生

至於半年盈利倒退43%的中信泰富（00267），在派成績表後，下半場升幅收窄至1%，報收23.7元。其他大隻佬乏善可陳，難怪市場無乜炒作氣氛，古勝睇住個市亦眼瞓。

期貨場明日結算，在下預計過埋月結，本地魚缸才會有較明確方向，不過無新水流入係一個問題，水盡鵝飛市場無氣氛，無論大隻佬定係二三線股仔都係得個悶字。

值得留意係早兩個月炒到飛沙走石的股仔，陸續頂唔順，甚至有輕微爆煲迹象。古勝之前都有提醒看官，炒到啲蚊型股，真係見好即收，先食胡套利幾時都無錯。

家陣業績期，唔單止斷估專家忙到死，古勝日日睇多份成績表兼中期報告，睇到眼水標。趁呢個時候搵定有潛質同盈利前景理想股份，先列入觀察名單，一旦魚缸在九月出現較深度調整，亦可趁低吸納。中國南車（01766）已派中期成績表，雖然中期業績倒退23%，但國務院批覆22個城市共79條交通鐵路，公司股價受利好消息刺激，近日逆市上升。南車半年中期成績表唔多好睇，古勝卻認為全年成績表至見真章，皆因多項工程滯後至下半年入帳，全年成績表應見得吓人。

機車業務步增長期

南車旗下的機車業務近幾年的增長主要來自於更新換代的需求，上半年收入同比持平，主要是由於6軸9,600千瓦和6軸7,200千瓦大功率機車均處於試驗階段，僅有小量交付，下半年在手定單將陸續交付，帶來機車業務的高速增長，預計全年收入可勁增至少八成。短炒亦有刺激因素，皆因北車上市在即，整體改制上市工作已進入中證監審批階段，估計今年之內應可登陸祖國魚缸A股市場，祖國魚缸有新丁上市，表現鮮有失手，南車實質更較北車佳，料發揮影子股效應。

古勝