肌萎病人繪畫頌親恩

新地會邀請參賽者分享勵志故事，希望透過連串活動鼓勵二十八萬名會員以及港人與屋企人多啲互相支持，是次參賽作品近五千份，形式多元化，包括散文、短句、歌詞、照片、影片、圖畫及陶瓷等。獲得高中組冠軍嘅李偉霸係一位肌肉萎縮症病人，佢以口代手畫咗幅畫，畫出媽媽不眠不休照顧自己嘅情形，仲寫上「偉大嘅母親眠乾睡濕，無微關愛，不離不棄，養我育我」，表達對媽媽嘅謝意。

「霸仔」雖然雙手已經郁唔到，但佢每日都努力用口含筆練習繪畫。佢仲想鼓勵香港人要珍惜每一天，所以打算畫八十呎長、名為「精彩每一天」嘅卷軸，以港人生活點滴為題，鼓勵大家要活得精彩。

會員組冠軍係周嘉瀅，嘉瀅接受咗新工作，對於新挑戰覺得好迷惘，終於忍唔住喺父母面前喊咗出來，有一晚，佢收到一盒最鍾意食嘅杧果糯米糍，附有一張字條寫上「親愛的女兒，請笑納。愛你的爸爸。」原來盒糯米糍係爸爸喺西餅店收工後，央求西餅師傅整嘅。

余絲韻