本文重點
上市公司主席退休，通常係屬於對公司不利嘅消息，股價一般會跌，但凡事都有例外。堡獅龍（00592）上周五公布，羅家聖因退休已辭任執行董事及董事局主席，改做集團顧問，仲即日生效。公布後嘅首個交易日即係尋日，堡獅龍股價飆升24%，絲絲聽朋友話，可能市場憧憬羅氏退休後，公司可以順利賣盤，所以股價不跌反升。
市場憧憬賣盤在望
堡獅龍曾於上月二十七日下午突然停牌，話公司嘅控制權可能有轉變，原來持股68.58%股東嘅羅家聖正與一名投資者磋商轉讓股權。市場憧憬堡獅龍成功賣盤，復牌後唔單只堡獅龍嘅股價狂升，亦連帶同業嘅股價都升。
點知唔夠幾日，公司話羅家聖已終止洽售公司股權，股價即狂跌16%，市場對此非常失望，事關之前傳有外資公司對堡獅龍有興趣，以為可以易手，但之後都失敗。而今次羅氏退休，亦未公布新主席人選，市場憧憬堡獅龍可能會好快易手，股價就先炒上，尋日曾升逾三成，收市時仍升24%，收報0.465元。
余絲韻