本文重點
中移（00941）董事長王建宙尋日與宏達（HTC）董事長王雪紅嘅一場「雙王會」，將王建宙嘅台灣之旅推向高峰，雙方除咗簽訂總值4,700萬元人民幣嘅OPhone手機合作備忘錄外，王建宙更喺媒體面前大讚王雪紅心思細密，再次證明王雪紅係盡得其父王永慶嘅真傳。
王建宙激讚王雪紅
HTC靠Smartphone喺國際手機市場異軍突起，王雪紅因而被公認為王永慶家族成員中最出色嘅其中一員，王建宙話王雪紅最令人印象深刻嘅，就係每次同佢見面時，佢都會仔細詢問中移客戶喺使用HTC產品時所遇到嘅問題，以及產品需要改進嘅地方。兩人雖然係首次於台灣見面，但王建宙話兩人已經係之前相見多次嘅朋友嘞。
今次王建宙台灣之行有一個驚訝，就係工程師出身嘅HTC執行長周永明原來酷愛雕塑，王建宙參觀過擁有200人團隊嘅Magic Lab後，對於呢位能令公司200人團隊只專心搞創業嘅CEO相當敬佩。
王建宙尋日另一場重頭戲，係與遠傳董事長徐旭東、中華電信董事長呂學錦、Acer董事長王振堂及華碩董事長施崇棠等13位台灣電訊科技巨企管理層嘅午餐約會，足見台灣電訊業界對拓展內地市場嘅重視。
余絲韻