大市真係玩死班鑊鏟友，上個禮拜升吓跌吓，炒到無晒方向，而上周五仲要玩高開低收，點知美股又突然大玩爆升，搞到尋日高開後都唔知追貨定唔追貨好。股仔經過一輪靜局場面後，本來尋日朝早開始啲炒味慢慢出番來，但市場陸續見有股仔急散，又令啲股仔買盤縮番晒，結果下半場又變回悶局一場。
鐵礦石談判錄得突破性進展，未來鐵礦石定價唔使再睇晒人家面色，對鋼鐵企業自然係好事。近日亦傳出內地有意改革鋼鐵企業，重組以做大做強為合併方針，首長國際（00697）母公司首鋼集團係內地首屈一指嘅鋼鐵巨無霸，如果一旦進行重組，首國看來最得益，近期守住1.4元見底回升，尋日成交增加炒上，有勢唔怕追，向上睇2蚊，穿1.4元止蝕。
古晨