花旗魚缸上周五走勢大勇，亞太區魚缸昨日普遍做好，祖國魚缸早段表現平平，上證午後發力升逾1%，但本地魚缸未見分外受惠。恒指盤中高見20,649點，升幅超過400點，不過都係期貨大戶幹的好事，挾高期指都係為咗「招呼」淡友啫。恒指散場報收20,535點，升336點；國企指數則升238點，報收11,703點。現貨場成交額只有622億元唔算多，缸邊友見裂口高開，邊個咁夠薑肯高位追貨，古勝烏卜卜，但從成交所見，缸邊友寧觀望唔入貨，魚缸成交難免買少見少。
巨無霸祖國移動（00941）上星期派咗成績表，一句講晒「無晒憧憬」，自3G網絡啟動後，祖移過往獨霸市場的日子不再，仲要被二奶電話（00762）同祖國電信（00728）兩個齊齊夾擊。
潤電績佳芬佬掃貨
祖國電信更成後起之秀，芬佬換畫係正常投資行為，祖移昨日逆市跌1.1%，報收79.05元。相反華潤電力（00836）派出加入成分股家庭後首份成績表，中期純利勁升1.25倍，派息亦增加兩成，芬佬急急腳搶貨，令其股價盤中高見17.56元，報收17.44元，升5.19%。大笨象（00005）升1.8%，報收84.25元，始終未能平ADR佳績。
「油魔」久休後甦醒，十月份期油更升至10個月以來高位，刺激中海油（00883）及中石油（00857）分別升3.4%及2.4%。紅色錢莊業績亦報捷，全線做好帶動金融板塊向上，普遍上升逾2%，古勝相信紅色錢莊有本事帶領本地魚缸再挑戰二萬一點關。
網絡建設商機龐大
祖國移動業績差強人意，但電訊設備股卻受惠祖國3G網絡擴充，中興（00763）日前派成績表，盈利增長逾四成。中通服（00552）將於下周一派成績表，公仔圖表技術走勢轉佳，料業績公布前會落一落鑊，可以搭番一程順風車。祖國去年電訊固定資產投資完成額急升30%至2,954億元（人仔‧下同），今年首5個月亦升17%至877億元。
預期未來3年，祖國將投放4,000億元於3G網絡建設。如此龐大的建網開支金額，對一眾電訊設備股而言，絕對是無限商機。睇番中通服近日走勢落後於中興及京信通信（02342），昨日亦僅升0.4%，報收4.59港元，股價暫時仍受制於10日線及50日線。
在七月份本地魚缸大旺之際，在國指成分股之中，中通服升幅不足3%，今個月暫時更一直開倒車，排在最差表現的第五位，落後咁多條街，只要份成績表見得人，唔排除業績後見真章，後發先至。
古勝