中四發力 會考18分

Eugene兒時住喺勵德邨，活動範圍好細，多數係屋企附近，「當時每隔4層樓就有乒乓波枱，差唔多每個小朋友都識打乒乓波，4人一組分隊搓波，贏咗先可繼續霸佔波枱，但最好玩反而係輸波，因為可以走上走落搵人『挑戰』。」

中學時讀男校，佢自言讀書麻麻，成日掛住踢波，直至中四時怕讀書唔成無出路，便決定發憤上進，「我唔算好叻，只算好運，當時會考只計5科成績，滿分係25分，自己考獲18分，成績尚算滿意。」高考時因選修文商，大學時就順利選讀工商管理，當時Eugene未知金融為何物，第一次落場投資是在畢業後，「剛出嚟工作時，每日見到好多錢不斷往來，但錢永遠賺唔晒，你一定唔夠其他人多。」去年金融海嘯「來得快，去得快」，反應夠快嘅佢好彩蝕得唔多。

依家Eugene工作好忙，經常接受傳媒訪問，一周出鏡近10次，加埋出差，工作排得密麻，好少搵朋友敍舊，但佢就話「人在『缸』湖，身不由己」，呢啲係工作嘅一部分。佢喺十一月終於可放一個月大假抖抖，所有時間都會陪住老婆，因為囝囝到時會出世。佢第一次做老竇冇經驗，仲話若大家有陪月秘方，不妨過兩招畀佢。

余絲韻