本文重點
雷曼「冧檔」咁經典，英國廣播公司（BBC）都忍唔住要將佢拍成電視電影，據聞劇名暫定為《雷曼兄弟的最後歲月》（The Last Days of Lehman Brothers），預計片長約60分鐘，計劃十月份於BBC第二頻道首播。
呢套劇嘅卡士都唔嘢小，首先搵嚟曾獲奧斯卡最佳男主角提名嘅James Cormwell飾演美國前財長保爾森，絲絲喺收視勁好嘅連續劇《24》欣賞過佢嘅演出；另外亦搵嚟曾於《最後通牒》演出嘅Corey Johnson飾演雷曼最後一任行政總裁富爾德。
重演倒閉前最後歲月
故事內容主要圍繞富爾德喺雷曼倒閉嘅一周前，好拚命咁不斷尋求白武士打救，並講述佢同美國銀行及巴克萊高層談判，要求將雷曼合併嘅經過。故事另一邊廂亦講述保爾森如何力挽狂瀾，希望游說華爾街嘅大孖沙協力收購雷曼。但係故事嘅結局，相信大家都好清楚，就係雷曼負債纍纍，無人問津，被迫於去年九月十六日申請破產保護令，引發一場百年一遇嘅金融大海嘯，搞到環球金融體系接近崩潰。
之不過一班因購入雷曼迷債而變成雷曼苦主嘅朋友，睇呢齣劇集時感覺會係點呢？會因為重提傷心事而痛不欲生，定係會一路睇，一路大罵富爾德以及死都唔肯動用公帑嘅保爾森？
余絲韻