銀行界人士爆料話，由於今次係任總退休前最後一次飯局，所以反應非常踴躍，報名名額已經爆滿，大部分銀行都趁早買定至少一張枱，真係手快有手慢無。

銀公銀行學會9‧28設宴

絲絲計過，以一間喺港島具水準嘅酒店計，最大嗰個宴會廳大約擺到廿幾圍，一圍坐12個人計，今次排場閒閒哋都三百幾人。聽講任總知道班銀行家咁有心，都老懷安慰，第一時間答應會賞面出席。呢間被選中嘅港麗酒店，喺下個月嘅二十八日晚上將會星光熠熠。

據聞呢個晚宴冇乜特別嘅助興節目，只係大家簡簡單單坐埋食飯，以及有任總分享心聲嘅環節。銀公及銀行學會搞得呢個咁盛大莊重嘅晚宴，少不免會向任總致謝一番，負責致謝嘅代表睇嚟應該唔少得搞手之一嘅銀行學會行政總裁梁嘉麗，甚至係銀公主席王冬勝嗰份！

除咗銀行家有幸歡送任總，一班早前被任總高調讚揚嘅本地財經傳媒同樣有福氣，喺下個禮拜率先有機會同任總摸酒杯底。

余絲韻