祖國電信稍為秤先

祖國移動（00941）昨午派中期成績表，第二季純利跌1.6%差過市場預期，呢份樣衰業績一出，午後沽盤湧至，股價倒跌0.2%，報收82.85元。二奶電話（00762）跟祖國電信（00728）則公布七月份營運數據，前者GSM上客量放緩至68萬名，後者CDMA上客量創今年新高，達245萬名。三個紅色電話筒，祖國移動可以話前景最黯淡，唔單止新增客戶人數愈搞愈縮水，相反自從3G啟動後，祖國電信則成後起之秀，急起直追，邊隻紅色電話筒買得過，看官一定識揀。

工行（01398）亦派成績表，半年盈利略高於孖屐預期中位數，股價報收5.27元無起跌。其他紅色錢莊將陸續派成績表，呢期佢哋表現一般，即使魚缸反彈，佢哋近日都跑輸魚缸。大笨象（00005）升1.7%至82.95元散場，表現中規中矩。本地地主升幅較顯著，係昨日升市火車頭。

多得北大人扶持汽車業，紅色砵砵車今年開始進入高增長期，相關股份的升勢亦驚人，股東當然飲得杯落。除咗普通民用汽車，工業用汽車如拖拉機、重型卡車等，亦在重大政策上得到協調，中國重汽（03808）作為祖國卡車業的龍頭，當然受惠振興汽車產業的國策。近日重汽和啤酒國龍頭卡車股MAN合作成為策略股東，MAN以總代價4.86億歐元認購重汽於二○一二年到期的可換股票據，假若悉數行使所有票據，MAN將取得擴大後股本約21.7%。

重汽引入策略股東，集資所得的約70%即36.32億元用作許多技術及專門技術的國產化，包括改善設計及製造水平、更新製造設施、成立新生產線及提升產能。至於餘下約30%即15.57億元，將用作一般營運資本，亦有助減輕債務和財務負擔。

策略股東提升技術

重汽跟MAN行埋，除成功集資外，更可獲得MAN的汽車製作技術，MAN則可透過重汽的低成本工序，生產廉價但高性能的重型卡車，重汽亦能藉此打進國際市場。未來雙方將推出新品牌卡車，推出市場的時間、定價等仍須進一步磋商，新產品將針對祖國較高端的市場，絕對係一個雙贏組合。

古勝