尋日港股繼續波動，恒指早上時段反覆上落，中午收報20,322點，升16點，大市仍未有太大方向。但午後回來，內地股市突然急插，拖累恒指下午開市亦急插近500點，最終收市報19,954點，20,000點終告失守，大市成交亦下跌至644億元。大市波動至極，股友們心理質素真係要自我調校一番。
大市呢幾日反覆，真係可謂將唔少好友的信心打至低點，聽番啲證券行老友講，十個散戶中有八個都係睇淡。就連周二衍生市場的資金流向，亦顯示資金流入熊證居多。不過，傳統上散戶與大戶看法一向有出入，尋日高盛就發表一份報告，維持對H股市場的樂觀看法，並維持對國企指數於年底可升達13,200點的預測。高盛表態看好，股友則在資金上表態看淡，未知誰勝誰負？
（小尾）