27%人年薪逾195萬

統計結果顯示，有39%居港嘅海外僱員年薪逾20萬美元（逾156萬港元），有27%更超過25萬美元（逾195萬港元），九成人搵多過佢哋喺原居地嘅收入，所以好到唔諗住走，留喺香港發展。

同樣係過江龍，點解喺香港會特別矜貴？滙豐國際高級地區經理夏景麟話，佢哋理財有道、應變力強，比其他地區嘅海外僱員更具適應力，照咁睇又的確物有所值。不過香港百物騰貴兼撞正經濟衰退，近一半受訪者都話會取消豪華度假同消閒活動，符合佢哋適應力強嘅特質。

如果以全球計，俄羅斯、卡塔爾及沙特阿拉伯嘅海外僱員人工依次排喺香港之前，原來去新興市場拓展業務真係零舍唔同，怪唔得啲跨國企業高層爭住去做「開荒牛」，原來唔止公司賺大錢，連員工「掘金」都特別快！

余絲韻