本文重點
私有化鬧劇令電盈（00008）股價一沉不起之際，電盈尋日又鬧出集體減持公司股份疑雲，港交所（00388）股權披露資料昨公布，電盈董事總經理艾維朗喺電盈持股由0.2%減至0.15%，另外兩名執董鍾楚義及彭德雅嘅持股亦同時減少，咁大件事梗係要查證，原來只係佢哋所持嘅購股票據失效，根本無減持公司股份！
電盈董事鬧出集體減持疑雲其實已非首次，究其原因都係因為本身股價一沉不起，公司早年發出嘅天價購股權變成廢紙。
根據昨日披露，呢批失效嘅購股權，喺○○年八月十七日起計嘅9年有效，行使價為11.78元，按購股權分布，艾維朗佔320萬、鍾楚義佔357.52萬、彭德雅佔27.2萬，目前佢哋仲分別持有3批行使價介乎4.35元至60.12元嘅認股權，其中60.12元嗰批將於明年六月到期，其成為「廢紙」嘅機會率相信非常之高。
管理層避見傳媒
電盈今日公布中期業績，唔知係咪因為公司負面新聞實在太多，管理層又再次避見傳媒，而業績發布會只係招待分析員，一般投資者就只可收睇網上直播，公司透明度大不如前，電盈管理層又再次失分！
余絲韻