本文重點
仲有兩個月就公布「2009胡潤百富榜」嘅新名單，據製榜人胡潤透露，曾3次問鼎中國首富嘅國美電器（00493）老闆黃光裕仍可上榜。之不過證監會早前已入稟本港高等法院，凍結佢超過16億元嘅資產及國美股份，就算佢真係入榜，可能係紙上富貴。
富豪資產回復增長
暫時失去咗自由，並正接受調查嘅黃光裕，其將來去向係點無人知，不過呢個月初黃光裕先至出資5.49億元認購咗國美8.16億股新股，連埋黃太，佢哋兩人揸住公司34%股份，第一大股東嘅地位非常穩固。就係咁，胡潤話佢今年仍會躋身百富榜。
去年全球股市狂瀉，樓價暴跌，內地富豪嘅身家大縮水，不過今年內地樓市、股市都升番唔少，內地經濟指標及各項財富指標表現都好好。胡潤露咗少少口風，話雖然家陣大家擔心股市可能會再跌，但今年富豪資產比去年增長唔少，應該幾樂觀。
余絲韻