周文耀邀請拍住上

李小加自從今年六月被正式委任後，今次係佢首次出席公開場合，自然引嚟唔少人埋身追訪，不過，佢就堅拒接受採訪，可能同佢未正式上任，以及對現任總裁周文耀以示尊重有關。

不過佢遲早都要同周文耀同場出現，不如趁早嚟個熱身。絲絲聽聞今次佢出席上市儀式係周文耀主動邀請，聽講佢哋尋日一早與台交所高層開早餐會議，之後周文耀話不如一齊去上市儀式，佢考慮咗一陣就決定前往。

喺上市儀式上，周文耀介紹李小加畀在場人士認識，兩人仲大方一起合照，睇嚟兩人相處應該不成問題。見到李小加喺場內表現活躍，同唔少人傾偈，睇嚟佢都應該好快適應喺交易所工作嘅日子。

佢依家如果人在香港，都會非正式咁返港交所同周文耀溝通，了解工作大計。絲絲就有興趣知道，港交所裝修咗間新辦公室畀佢未？

余絲韻