祖移業績恐有驚冇喜

大笨象（00005）昨日除淨，股價跌1.5%，報收81.55元，股東未能財息兼收。祖國移動（00941）今日派成績表，呢幾日祖移走勢偏弱，好似預告咗業績有驚冇喜。其他大隻佬普遍下跌，以資源股跌得較傷，同祖國魚缸情況一樣。

中石化（00386）係少數逆市上升大隻佬，阿媽成功收購ADDAX，加上「小魔怪」在中石化派成績表前力撐，上調其目標價至8.5元，並指其次季純利較首季將勁升44%，支持中石化股價反覆做好，一度升逾3%，報收6.67元，升1.2%。不過中海油（00883）跟中石油（00857）在「油魔」甦醒後，仍跟魚缸下跌，前者險守10元，跌近2%，後者跌1.1%，報收8.46元。

個別股份呢兩日最矚目係保興發展（01141），股價在復牌後兩個交易日高台跳水，在一個星期內，股價由停賽前最高1.38元，跌至昨日報收0.385元，得番個尾數，咪話唔兇殘。保興指收購中國建設重工交易有變數，並終止配股，成間公司就因為咁樣，市值蒸發七成。幸而保興之前交投並唔活躍，鮮有缸邊友參與，否則死得人多。

查實股仔搞收購注資，好似保興呢種情況常出現，所以炒注資好多時都係膽博膽，呢排市況反覆，古勝認為都係搵番中型股買較穩陣，至少有得守。上海實業（00363）較早前公布向阿媽收購上海青浦區兩幅上海住宅用地，興建豪宅項目，收購價15.25億元人仔，扣除該項目公司所持的1.05億元人仔，收購價相等於項目實際估值55.6%，呢個價可以話筍到爆。

母公司注資陸續有來

自上實出售中芯國際（00981）及光明乳業權益後，基本上已完成出售非核心資產，公司集中火力搞祖國房產及公路基建，未來會繼續積極進行購併，市場對上實呢個發展方向反應相當正面，唔少大行都唱好。

作為上海市政府窗口企業，上海已定位發展為祖國另一個國際金融中心及航運城市，上實今後的核心業務，料可受惠城市發展。雖然上海重組步伐係就係慢半拍，但有心唔怕遲，為咗壯大核心業務發展，在下相信注資陸續有來。上實阿媽青浦區還有另外兩塊可建樓面75.2萬平方米的住宅用地，再加碼為上實注資亦唔出奇，實在惹人憧憬，值得逢低吸納作中線投資。

古勝