恒指雖然尋日一跌就跌咗六百幾點，而藍籌股之中，亦只得四隻仍保持升勢，其餘則一概下跌，之不過藍籌表現弱，細價股就有運行，雖然論升勢，一定唔及早前咁風光，但就見唔少早前落過鑊、炒到癲的股份，都再出現番在升幅榜中。既然炒股唔炒市，大膽的話，不妨朝早搵料下午食，執番少少。
港交所（00388）尋日公布了上半年業績，由於表現只係合乎市場預期，故未能為大市帶來驚喜，午後回來，其股價更出現較深度的調整。小尾就唔明，既然大家都話港交所業績係合乎預期，咁點解日前積極炒上，尋日就狂沽離場？下晝同啲前輩傾開偈，老行尊就提醒話，呢啲現象出現，就正好話畀大家聽，大市快要來一個深度調整。
（小尾）