本文重點
股市愈升愈有，但經濟係咪好番呢個問題，市場人士仍然你一言我一語，經濟學家都拗到面紅耳赤，不過香港人最值得驕傲嘅地方，就係我哋嘅善心，萬事達卡喺三到四月做嘅調查顯示，有67%港人打算喺下半年捐錢做善事，較上半年多成24個百分點。
13%擬捐逾半成收入
肯捐錢之餘，絲絲覺得捐幾多都好睇到善心程度，你話貧窮小學生捐100蚊，同城中富豪捐1萬蚊，邊個抵錫啲？港人一啲都唔失禮，有13%消費者打算捐出一年收入嘅5%以上，有64%就會捐少過2%，扣埋交稅，我哋捐錢真係唔算捐得少。
雖然母親節過咗一排，不過絲絲都要歌頌吓母愛嘅偉大，因為女性願意捐款嘅比例比男性多7個百分點，去到71%！
男士捐錢比例少，但絲絲睇番政府統計處上月底嘅最新報告，1萬至2萬元以及2萬元以上呢兩個收入階層，都係男士多過女士，所以絲絲認為肯捐錢嘅男士可以捐多啲補番數，為凸顯善心加把勁。
余絲韻