被追稅求助「紳士」

絲絲尋日同林生飯聚，講起佢周身公職好唔得閒。太平紳士有好多職責，例如去探訪監獄，聽吓犯人嘅訴求，林生就話近年犯人嘅訴求個人化咗好多，例如有人投訴話自己坐監收唔到稅單，結果係咁畀稅局追，叫太平紳士幫吓手。有口痕友就講笑話，林生探訪得多，問人ＯＫ唔ＯＫ都會講：「有冇要求？有冇投訴？」

林生係會計師出身，仲教過書，因乜事會轉行經商呢？佢話自己興趣廣泛，所以盤生意都好多元化，旗下投資項目好多，例如汽車美容、一站式結婚服務、餐廳，仲有間啤酒廠添！啲啤酒每日喺香港新鮮製造，佢自己都會飲自家品牌㗎！

余絲韻