本文重點
港交所（00388）尋日公布今年上半年成績表，由於係行政總裁周文耀最後一次主持業績發布會，佢被唔少人問及有何感受，點知佢話：「我仲有5個月至走，等到明年一月十二日，同傳媒午宴時至講感受啦！」佢喺明年一月十六日先至榮休離開交易所，即係話要等到佢差唔多Last day，佢至會同大家臨別贈言，大家等吓啦！
大派酒會簽名留念照
雖然周文耀暫時唔講感受住，但佢都好識做，記得今年六月港交所九周年酒會，佢心情大好，同到場嘉賓、記者逐一拍照留念，佢尋日趁住公布成績表，將曬咗嘅相連同佢嘅親筆簽名，送番畀同佢合照嘅人，仲話好多謝大家咁多年對交易所嘅支持，搞到個個收到相後都不知幾Happy！係咯，呢啲咪叫做公關功夫囉！
3年大計「問番李小加」
港交所依家正籌備緊未來3年（明年至二○一二年）嘅策略計劃，有小記問佢計劃內容，佢就話呢個3年計劃要問番佢嘅接班人李小加。李小加於十月中返港交所，唔知周文耀會唔會就此畀啲意見呢？港交所尋日喺業績報告上就講明，矢志要成為一個專注內地、香港以至亞洲其他地區嘅證券及衍生產品主要國際市場。
余絲韻