內地收緊銀根，似乎愈傳愈真，上半年內地新貸款超過7萬億元人民幣，但踏入下半年嘅第一個月份，竟然數字只得3,559億人仔，銀根收縮之快真係震散晒成個A股市場。未知係唔係經過上禮拜五「狼來了」大震倉教訓，尋日市場秩序異常良好，再無類似上禮拜五嗰種屠殺式斬倉驚嚇場面，雖說如此，不過久唔久就震一震，未來一段日子都會相當難玩。
股市一向都係資金帶動，如果北水真係減少，睇怕港股點都會調整吓，現時炒股都要回歸基本因素，好似隻海升果汁（00359）咁，本身有內需概念，加上不足5倍嘅超低市盈率，以內需股看，吸引力十足，古晨就係見佢在現水平橫行多時，隨時破頂炒上，在追落後下，睇1元絕非難事，止蝕位可放喺0.63元。
古晨