本文重點
由國際品牌營運嘅酒店普遍坐落市區，但近幾年名牌營運商先後落戶新界區，其中南豐位於沙田石門嘅酒店發展，該公司發展董事總經理蔡宏興同Vincent講，項目已開始做緊地基，希望可以在三年後開業，由於屬集團首間發展嘅酒店，所以現階段已經揀定營運者，雖然無講佢嘅大名，但就透露該營運者曾經進駐本港，但又離開咗，今次係再度來港發展，大家不妨估吓。
蔡氏話，營運者嘅大名暫時要賣個關子，到適當時間才會公布詳情，而酒店會屬於四星級，主要針對商務客。酒店將會樓高32層，設有440多個房間。
美聯重賞前線代理
近期樓市氣氛大旺，唔少代理行以重賞鼓勵前線代理落力跑數，美聯（01200）執行董事兼集團住宅部行政總裁陳坤興報喜話，自從舉行「七月份下半月增長跳班突破計劃」後，旗下多間分行喺七月下半月嘅營業額極速衝破200萬元大關，當中以天后栢景臺分行的團隊最突出，期內創出490萬元嘅營業額，可以獲贈餐飲禮券，而連同其他獎賞，今次送出嘅獎賞總值達2.3萬元。