有內地傳媒引述公司消息人士指，聯想控股已經請咗幾十位投資人才，設立新投資公司準備喺投資領域大展拳腳，即係話，未來聯想控股旗下會有3家投資公司。

吳亦兵傳領新公司

呢家新投資公司傳聞係由聯想控股常務副總裁兼麥肯錫前全球資深董事、亞太區購併整合業務總經理吳亦兵領軍，分量十足可想而知。

其實依家聯想控股旗下已經有兩家投資公司，包括聯想投資及弘毅投資，呢兩家公司都算幾活躍，絲絲曾經喺新股投資者推介會上，同佢哋嘅代表有一面之緣。

提到聯想，可能大家只諗起電腦，其實聯想控股旗下有5家子公司，除咗電腦及科技服務等業務外，仲有房地產、投資等項目。睇嚟佢哋唔單止想做電腦，仲想做埋綜合企業。

余絲韻