本文重點
打工除咗人工之外，員工福利當然都好重要，前排絲絲同保柏市場部幾位靚女食飯，傾開偈先發現原來保柏嘅福利多多，又非常關心員工嘅健康狀況，醫療保險專家呢個名果然絕非浪得虛名。
福利好 做得起勁
佢哋同絲絲講，公司會定期搞健康講座，員工仲可以免費注射流感疫苗；至於醫療保險福利當然唔少得，除咗員工本身有醫療保障外，員工家屬仲可以六五折優惠價投保。公司每月仲會搞大大小小嘅活動，畀員工紓緩一下工作壓力，之前就試過食自助餐同包場睇戲，最近仲請晒成班員工去坐昂坪360嘅水晶車。
嘩！公司咁體貼員工嘅需要，絕對可以激勵士氣，難怪保柏香港嘅生意不但無受金融海嘯打擊，今年上半年嘅生意額仲比去年同期升咗兩成。
員工愈做愈起勁，生意又一直好落去，相信早前旋風式「襲港」嘅保柏英國總部CEO都會非常滿意。保柏近日決定撈埋危疾保險，推出全新「智安保」危疾保障計劃，聽聞反應唔錯，收到唔少市民查詢添。
余絲韻