本文重點
馬來西亞證監會首次主辦嘅國際資本市場論壇，將於下星期一及星期二（本月十日及十一日）喺吉隆坡揭幕，聽聞今次國際論壇邀請到唔少重量級人馬畀面出席，好似香港證監會前主席、現任中銀監首席顧問沈聯濤，就會返老家出席研討會。沈聯濤係馬來西亞人，又曾於當地中央銀行任職多年，今次獲邀返老家出席國際論壇，都算係順理成章。
資本市場論壇陣容勁
除咗沈聯濤外，畀面出席嘅嘉賓仲有美國總統奧巴馬經濟顧問Laura Tyson、諾貝爾經濟學獎得主克魯格曼、有「光頭博士」之稱嘅麥博士，另外仲有中投、新加坡政府投資（GIC）等代表，聽聞香港亦有可能派官員代表出席，可謂陣容強勁。
今次嘅國際資本市場論壇，主題係探討現時資本市場嘅挑戰，同埋以亞洲角度看待及分析全球為應對金融海嘯嘅監管改革。從嘉賓嘅陣容名單嚟睇，到場參與者應該會有一定得着！
余絲韻