本文重點
五大證券經紀組織，包括證券商協會、證券學會、證券及期貨業職工會、網上經紀協會、專業財經分析及評論家協會，繼今個農曆新年破天荒咁一起舉行春茗，獲得唔錯反應後，之後唔少活動都聯合一起主辦，以壯大聲勢。據證券學會主席張華峰講，五大組織今年十月將籌備一起上訪北京，與包括中證監在內嘅單位見面，加強兩地金融業嘅溝通。
第三度聯合行動
數數手指，今次已經係佢哋第3次聯合行動，對上兩次包括春茗以及合辦持續進修課程（CPT），呢個仲未計佢哋一起邀請候任港交所（00388）行政總裁李小加食飯。
既然不時有聯合行動，有無諗過索性將五會合併，屆時聲音都大啲啦？張華峰坦言合併並唔容易，始終有5個組織咁多，各個組織又各自有會長，依家一齊搞活動，排名先後都係抽籤決定。
本地嘅華資證券經紀一直被人批評唔夠團結，除咗五大組織外，仲有本地大阿哥、剛改名嘅證券業協會，單是證券經紀組織已有6個，真係令人有點眼花繚亂。
余絲韻