許照中去台灣充電

僑豐金融行政總裁許照中喺周末就會去台灣小休幾日，點解咁匆忙只去幾日？原來佢下個禮拜要趕返嚟香港，開港交所（00388）董事局會議，審議今年上半年業績，都算係個盡責嘅董事。下個禮拜三係港交所公布中期業績嘅大日子，原本冇乜特別，但原來今次係港交所行政總裁周文耀最後一次主持業績發布會，所以分外令人注目。

周光暉做仔女「跟班」

會計師公會前會長周光暉今個暑假就冇出外遊埠，事關佢話佢啲「老闆」（即係仔女）喺外國放暑假返嚟，佢要做「跟班」抽空陪伴佢哋。

不過佢班仔女其實好忙，好似老四就話要去非洲坦桑尼亞做義工、建學校；老五又話要去土耳其同北京旅遊；老六唔使飛啦，但都要返內地打高爾夫球，所以話如今做人老竇真係唔易。

佢話今個月下旬係業績期，佢係招行（03968）及中遠太平洋（01199）嘅獨立非執行董事，除咗要開董事會審議業績，又要開審計委員會，屆時相信會忙過啲仔女。

余絲韻