本文重點
西鐵九龍南線通車在即，唔少市場人士預期會帶動西鐵沿線物業交投進一步轉旺，其中近月交投同樓價均見上升嘅元朗區，已成為各大中小型代理行兵家必爭之地，Vincent昨日途經區內大型商場新元朗中心，發現場內代理分行數量又再增加，除兩大龍頭大行外，利嘉閣旗下全新分行正裝修中，而區內「地膽行」建富物業亦喺商場內開設旗艦分行，並且增聘12人加強搶佔受通車效應帶來嘅商機。
建富執行董事冼杜講，公司最近兩個月嘅生意額已升約20%，收客量急升約20%至30%，料月中通車後可帶動生意額再升10%至20%，現時喺元朗區有3間分行，其中新元朗中心分行面積約900方呎，在上月十八日開業，年內公司人手已大增12人至約26人，增幅近90%。
港置「百萬分行」18間
近月代理行生意滔滔，香港置業行政總裁李志成向Vincent報喜話，受惠於新盤開售，七月份業績大躍進，共有18間「百萬分行」，當中以尖沙咀港景峯分行嘅成績最驕人，成功蟬聯「二百萬分行」及勇奪豪宅權威嘅「最佳業績分行」，至於位列亞軍及季軍嘅分行係將軍澳君傲灣分行與港島南貝沙灣分行。佢仲話，由於恒地（00012）擬趁市旺開賣油塘嘉賢居，所以正調動人手作配合，希望可以搶佔更多市場份額。
（Vincent Lau）