美國職業籃球聯賽NBA唔單只係運動、娛樂，仲係成功嘅商業例子，唔怪得李榮融都以佢嚟做央企發展藍本，佢話NBA成功之處在於有劇情，而製造劇情嘅正正就係場上球星。不過，球星都分明星同巨星兩種，明星雖然不停閃爍，但真正能承擔責任，從來唔會令教練、隊友失望嘅先係巨星。

李榮融話要培養央企為好似眾人偶像米高佐敦一樣嘅巨星，喺重要關頭「一定能扛起來」，承擔巨大責任。

「好老闆」不欺老實人

李榮融其實係央企老總嘅老總，自認係一個「好老闆」，唔會「蝦」老實人。佢話由○二至○七年間，佢平均每年為央企1,556位副總以上嘅領導加咗4,600蚊人工，仲話攞高薪要靠本事，但出糧畀員工都要講良心；佢又大爆之前有間大型國企老總年薪得6萬幾蚊，老總可以出少啲糧，但「下面的人早跑光了」。所以李榮融話佢做官嘅宗旨，就係唔欺負老實人。

余絲韻