本文重點
相信好多打工仔返工時都有個遐想，就係想即刻放假過番個悠長假期。中信嘉銀高級副總裁兼財富管理及零售信貸部主管劉月屏（洋名Zoe）啱啱喺意大利度假返嚟，絲絲眼見佢容光煥發，的確羨慕！佢仲話去埋當地酒莊參觀，不過就無買酒。
參觀釀酒場聽酒經
中信嘉銀近排搞咗好多活動畀佢哋班CITICfirst高端客戶，尋日就去咗本港唯一嘅釀酒場地參觀。嗰度有大師級人馬同大家講酒，Zoe笑話佢當然唔敢班門弄斧，都係邊飲邊聽。
三個禮拜嘅悠長假期，Zoe用咗部分時間去比較郊區嘅地方，仲歎咗啲好酒。雖然好多銀行家都有心水靚酒，唔靚、唔貴嘅都唔飲，但Zoe就話佢無特別喜好，仲話唔貴都可以有好多選擇。
雖然佢參觀咗酒莊，但因為嗰邊出境唔可以帶樽裝液體，所以都係與又抵買、又好飲嘅酒無緣。不過Zoe就睇中咗支靚橄欖油，因為靚過頭令佢唔記得呢個出境規矩，出境時支橄欖油就咁畀海關扣起咗，認真慘！
余絲韻