港股周二氣勢如虹，點知及後一連兩日出現高開低收格局，走勢認真麻麻。連跌兩日，尋日市場觀望氣氛相當濃厚，而股仔亦見有較顯著回吐，不過古晨覺得市場仲係大把錢炒作緊，相信整固下又會再起動過。
尋日有大行睇好鐵路基建股前景，中國中鐵（00390）等炒到飛起，內地未來會不停掟錢大搞鐵路去推動經濟，作為鐵路建設龍頭嘅中國南車（01766）自然係最受惠，今年業績表現信得過。在上海掛牌上市嘅時代新材，正正係佢仔仔，上半年溢利增長咗成58%，仔仔都咁叻仔，相信阿媽都唔差得去邊，過去一個月班芬佬已經不停咁買，近日壓住5元收貨，一旦又有大行「突然唱好」，爆上6.5元絕不為奇，4.4元近日守得幾穩，不妨作為止蝕參考價。
古晨