本文重點
絲絲之前一直密切留意蘇格蘭皇家銀行（RBS）亞洲業務會花落誰家，市場盛傳兩個入圍買家分別係澳紐銀行（ANZ）及渣打，結果ANZ奪得大部分業務之餘，仲喺香港舉行記者招待會，更「巧合」之處係記招時間又喺渣打公布業績及配股之前，未知親自來港坐鎮宣布喜事嘅總裁邵銘高，係咪想同對手「打個招呼」呢？
率ANZ挑戰舊東家
邵銘高過檔澳紐之前，係滙豐亞太區行政總裁，冇見一排佢仍然咁風趣同自信，不過收購完RBS亞洲業務後，有報道引述佢嘅接任人即係現任滙豐亞太區行政總裁霍嘉治話，區內競爭形勢唔會大變。
剛啱達成收購協議嘅邵銘高，躊躇滿志諗住大展拳腳，即刻反擊，話佢拒絕有霍嘉治嗰種諗法，仲笑言叫滙豐小心啲，之後佢亦講到明，話亞洲區最大對手就係滙豐同花旗。
至於渣打公布業績兼配股就撞正颱風「天鵝」打到嚟，臨時將記招推前近兩個鐘到下午3點舉行，渣打亞洲區行政總裁白承睿向一眾傳媒「耍冧」，話為咗同大家解釋清楚，迫不得已先咁做，希望大家明白喎。
余絲韻