大市尋日一開就已經升穿21,000點，雖然有滙控（00005）靚靚業績頂住，但收市倒跌十點，恒指出支陰燭，走勢就認真麻麻。
不過市場勝在水頭充足，唔少股仔回吐咗幾格，就見跌唔落，大市升得咁急，估計都係略為調整吓後，就會掉頭回升，正所謂好股沽唔散，趁市回吐時不妨尋吓寶。
尋日最令古晨印象深刻嘅，就係隻國美電器（00493），近期國美剛剛完成供股，啲新股剛剛出籠，如果以國美嘅家電內銷規模計，現價絕對係超值，現時集團供完股，加上早前引入新資金，相信夠晒集團現時嘅資金需求。
近期內銷股鑊氣夠晒，早前唔少大行申報增持，基金一早埋晒位，要見3蚊絕對唔難，止蝕位可以放喺2元。
古晨