本文重點
阿里巴巴曾經稱霸西湖十年不在話下，公司舊址更成為杭州人眼中嘅重要地標。不過由下月七日開始，阿里嘅「西湖時代」將會正式結束，皆因主席馬雲決定大遷徙，連同公司上下6,000多位員工搬去濱江濱興路和中河高架橋交界。
市政府識做迎貴賓
絲絲當然唔係想講阿里巴巴搬屋咁簡單，而係阿里巴巴嘅威望，竟然帶動當地房產樓價飆升差不多成倍。冇計啦，企業突然遷址，員工為保飯碗惟有跟住搬老家，新公司附近嘅樓價就因為需求上升，即刻被趁機抬高，以一間三房一廳嘅屋為例，之前月租1,500元有交易，但家陣足足要畀2,500元先有得傾。
不過，好彩當地市政府都好識做，見到班大財主進駐當地，即刻好細心咁製作一本「濱江區生活寶典」，交通、飲食、休閒及消費等配套資訊可謂包羅萬有，各位阿里巴巴員工貴賓惟有疊埋心水歎世界。
余絲韻