本文重點
年屆退休嘅北控（00392）主席衣錫群，原來同中信集團董事長孔丹、招商局集團董事長秦曉及中國名導演陳凱歌都係北京「第一牛中學」──北京四中嘅校友，佢到依家都仲珍存與呢幾位校友一齊影過嘅相片。不過佢就唔似得孔丹同秦曉咁鍾意捉圍棋，而係勁鍾意寫詩，仲作咗唔少添，北控老友同絲絲講，佢唔係咁輕易攞畀人睇㗎，有人問過佢寫詩嘅嘢，佢依家都會話40年前都仲寫嘅，家陣都係鍾意運動多啲囉。
所有中層配備計步器
衣總話佢只要身在香港，都會成日喺清晨去爬吓太平山，唔單只係佢自己鍾意運動，佢仲喺北控內部推廣「530運動」，究竟係乜？原來係叫員工每周5日，每日至少要步行半個鐘，仲認真到公司所有中層員工佩埋計步器，唔知年尾會唔會計住佢哋行咗幾多步就加幾多人工呢？
講到工作魄力，身為北控揸弗人，衣錫群一啲都唔輸蝕，由出售非核心，重組燃氣業務注入北控，再分拆北控水務（00371）等，佢樣樣都做得好好睇睇，絲絲深信同佢哋出身名學校，個底打得夠堅有好大關係，事關當年就連中共前領導人鄧小平嘅仔鄧樸方想入北京四中，都因為分數未夠而入唔到，喺呢間學校畢業嘅人，86%會派到全國重點大學，當中又有大部分考到北大同清華，你話幾勁呢！
余絲韻