金管局再接熱錢，資金入市掃不停，港股破完一關又一關。大市氣氛咁好，雖然有大戶話明20,000點樓上會減磅，但啲鑊鏟友理都無理，一於炒咗先講，相信期指結算前，咁好嘅氣氛都唔會點改變。
股仔連炒個幾禮拜，市場開始愈來愈多新星出現，在資金充裕下，加上新鮮感作怪，唔少新星表現都幾突出，而古晨留意到隻黃河實業（00318）剛剛起動。早兩個禮拜，黃河入股咗一個環保鋰離子電池項目，產品可以應用喺電動汽車身上，眾所周知近期電動汽車概念有幾猛料啦，單單睇隻比亞迪（01211）畀班基金掃到甩碌，就知呢啲電池項目有幾吃香，黃河尋日先剛剛開車，有勢不妨跟吓，要見0.35元絕對唔難，止蝕位不妨放在0.24元。
古晨