引炒股巨資便利好市

跨境人民幣結算試點為兩地企業提供了人民幣匯出和匯入的合法渠道，不過，試點初期受惠企業不過百幾間，兼且大部分企業都有好多難以解釋的資金往來，走正常渠道需要花心思包裝，所以就算以後人民幣結算全面開放，相信便利而不受監管的地下錢莊始終都係最受青睞。

近排中港兩地股市氣勢如虹，大大助長內地投資者透過地下錢莊違法炒港股的風氣，亦有不少香港投資者如法炮製回歸炒Ａ股，令地下水流洶湧，而當中除了私企老闆及大散戶外，原來部分地方大員都有貢獻。

金占士近排就聽聞，有位內地地方大員一日之內，就匯了三千多萬來港賺快錢，還四處打電話向親朋戚友推薦地下錢莊的便利性。話說近期由於兩岸三地經貿往來日益密切，地下錢莊還可以提供人民幣、港紙、台幣等多幣種的一條龍服務，連金占士聽罷都忍不住要佩服地下錢莊的生意頭腦，難怪官方三令五申都無法抑制投機資本的流動啦！

金占士