本文重點
華懋集團前主席龔如心遺產旗下嘅安寧控股（00128）尋日發出通告，話同業主訂立一項重續租賃協議，主要係因為公司喺○一年同業主訂立咗租約，租用尖東華懋廣場單位做辦公室，業主就係小甜甜遺產控制嘅公司，但有關租約喺本月底就屆滿，而安寧就話依家正搵緊新嘅辦公室搬，所以同業主只係續租5個月貨仔，月租15.3萬元，呎租19蚊。
至於公司究竟會搬去邊就無披露，絲絲心諗，華懋集團都搬去荃灣如心廣場啦，點解安寧唔搬埋入去荃灣呢？唔通小甜甜一唔喺度，安寧同華懋就無以前咁好關係？
唔搬入如心咪亂諗
但老友記就話，咁又未必咁嚴重，因為尖東話晒都係市區兼且交通方便，如果搬去荃灣（雖然有個西鐵站喺附近），點都無市區咁方便。不過依家旺區寫字樓嘅租金都唔係咁平，到時安寧究竟搬去邊仍無人知，但會唔會仲係呎租19蚊，就真係好難講。
余絲韻