本文重點
中大印刷（00055）早前收購咗新時代娛樂（Neway Entertainment），並即將改名為中星集團，以反映新嘅業務發展，中大印刷行政總裁兼執行董事薛嘉麟就解釋話，中星集團個「中」字有多重意義，公司未來發展無論係印刷又好、娛樂業務又好，都會着重喺中國大陸發展，尤其係新時代娛樂旗下嘅音樂與電影製作業務，所以就要保留個「中」字，反映公司將來嘅業務重點。
佢又話佢爸爸薛濟傑即中大印刷嘅創辦人，以前喺大陸拚搏，對中國好有感情，同埋自己身為中國人，對個「中」字始終有情意結，加上中大印刷本身亦有個「中」字，所以個「中」字好重要。
未來業務雙線發展
另外個「星」字就唔使多講，當然係與明星有關。現時新時代娛樂旗下藝人包括張智霖、胡杏兒及HotCha等，薛嘉麟話嚟緊會繼續發掘更多新星，所以新名要加番個「星」字，以反映將來公司業務係同娛樂事業有關。
佢話中國經濟增長迅速，認為內地電影及影音等業務前景樂觀，可為集團帶來增長力。但佢就強調唔會淨係發展娛樂業務而放棄本業，仲話集團將來會雙線發展。
余絲韻