古勝昨日已表示，本地魚缸在二萬一點前，不會遇到太大阻力，加上大戶要殺盡20,200點水平的恒指熊仔，果然昨日本地魚缸甫開波，恒指輕易突破二萬關，高見20,386點，幾億份熊仔自動打靶，下半場大部分時間在20,200點水平上落，散場報收20,251點，升268點或1.3%。國企指數略為跑贏恒指，報收12,189點，升205點或1.7%；現貨場成交額為809億元。

大炒回歸A股概念

大笨象（00005）下半場倒跌，報收72.8元，跌0.6%。本地地主再一次撐起魚缸，超人旗艦（00001）回復紅底大隻佬身份。「瑞士佬」唱好本地屋仔市場，指至明年底樓價可漲32%。吹水報告睇好斑點狗（00101）跟超人旗艦。「高佬盛」亦睇好香江屋仔市場，但跟「瑞士佬」各有所好，高佬盛首選三兄弟檔口（00016），同時也睇好超人旗艦。

四川成渝高速（00107）A股昨日登陸祖國魚缸，報收10.9元人仔，較招股價勁升203%，盤中更兩度漲停板。成渝H股在下半場發力，股價升5.5%，相對A股，H股可以話落後幾條街。不過，成渝A股升得過分，現價已漲至極不合理水平。

本地缸邊友搵同樣有意回歸祖國魚缸的股份落鑊，祖國移動（00941）升逾4%，終能重返80元水平，報收80.35元。中海油（00883）亦具回歸A股概念，升不足1%，報收10.56元。又係尋寶遊戲的時候，看官不妨數數尚有幾多紅色分子未回歸，回歸祖國魚缸的概念股，料近日會成熱捧對象。

中信資源（01205）成功變身，有無機會回歸祖國魚缸，目前言之尚早。不過，在低息環境下，「通脹怪獸」就算唔發惡，資源價格亦逐步回升，石油股值得睇高一線。雖然管理層已表示，考慮到股東利益，在錳價仍未回升至較高水平前，目前不是分拆有關業務上市的最好時機。

石油業務貢獻漸增

不過集團的油田及礦務業務的貢獻已漸漸浮現，當中哈薩克斯坦項目為最大的收入來源，相信今年在再沒有減值撥備下，盈利將大幅上升。為了增加戰略能源儲備，北大人一直鼓勵企業「走出去」，中信資源業務遍布袋鼠國、哈薩克斯坦和印尼，是「走出去」的成功例子。

中信資源的油價槓桿效應遠高於其餘中國三大石油公司，當旗下的海南月東油田投產後，總石油產量將由○九年的600萬桶，大增至一一年的1,200萬桶。中信資源雖然唔係國企，但跟中央有着緊密的關係，是紅色石油股的折讓選擇。

古勝