本文重點
迷信嘅人相信，逢係日全食嘅年份就會有厄運。前幾日長江沿岸一帶居民見證咗幾百年一遇嘅日全食奇景，但係上蒼保佑，內地今年仲未有死傷慘重嘅天災人禍，除咗啱啱發生嘅新疆暴亂之外，所以啲保險公司今年都無咁驚。
今年最嚴重嘅人禍，要數年初嘅央視大火，嗰場大火燒到成棟大樓得番棚骨，疑點重重，包括係咪偷工減料令到隔火材料唔實在，又有幾十個人被拉咗，懷疑係非法燃放煙花。投資者最關心嘅係，獨家承保央視大樓15億人仔嘅中國財險（02328），究竟使唔使賠？
央視遲遲未索賠
聽聞內地安監局已經認定燃放煙花係非法行為，但財險仲未脫險，因為除非係央視「指使」從事非法行動，保險公司先至唔使賠。照咁講，財險輸梗喇，但係央視又遲遲唔上門要求賠償。唔知係咪大家都係阿爺嘅，賠錢都係左手交右手，所以唔敢出聲呢？
余絲韻