本文重點
擾攘咗成十個月嘅雷曼迷債事件，日前終於有和解方案出台，唔少人紛紛解構邊個係今次和解嘅幕後功臣。一向牙擦嘅立法會議員詹培忠，話自己唔係要認叻攞功勞，但就忍唔住自爆話今次雷曼終極和解方案，原來最早係由佢提出。
最早提出和解方案
佢話喺好早嘅時候，佢已向政府提出65歲以上嘅苦主獲賠七成，65歲以下嘅苦主獲賠四至六成，之後政府亦同意賠六至七成框架。佢之後亦有幫手斡旋，從而向內地反映有關方案，佔咗迷債銷售最大份嘅中銀最後亦接受。
詹培忠話喺終極方案公布日早上，證監會行政總裁韋奕禮都有禮貌上通知佢。佢話依家嘅方案中間落墨，大部分苦主獲賠七成，佢勸苦主接受，惟有當今次係一個警惕同教訓，而專業投資者就可能要繼續同銀行打官司。
佢話和解雖已告一段落，但立法會仍會追究今次係咪有監管機構監管不力，商罪科亦要睇吓有無涉及欺詐等。
余絲韻