本文重點
新一代「輪后」荷合股票衍生部助理董事梁麗珊（Lisa）同絲絲講，佢係屋企嘅獨生女，可以話萬千寵愛在一身，由細到大屋企人都錫到佢燶！不過因為媽媽工作時間唔多定時，好多時放工都仲要「OT」，想見到媽媽就要等到夜晚；相反爸爸嘅工作時間穩定啲，所以接送佢返學放學嘅任務就由Daddy負責，仲要照顧埋佢嘅起居飲食添。
Lisa笑笑口話，講到做家務，爸爸就真係唔夠媽媽細心喇！不過爸爸煮嘢食真係一流，識整好多味撚手小菜，而Lisa最愛就係佢煮嘅西餐，當中意粉更加係無得頂！原來Lisa細細個就好鍾意食嘢，特別鍾愛中西甜品！
「潮爸」遺傳愛扮靚
順帶一提，原來Lisa爸係一個「潮爸」，後生嗰時已打扮得好前衞，會吹個「蛋撻頭」出街，連Lisa一身嘅衫都係由佢揀嘅，到咗依家佢爸爸仲非常姿整，所以「輪后」話自己咁貪靚，都係深得爸爸嘅真傳！
Lisa仲話，佢同父母嘅關係好緊密，佢細個嗰陣由屋企人照顧，依家就由佢照顧番父母，做咗一家之主後，佢成日都好擔心父母嘅健康，之前幾次父母出入醫院，Lisa都好緊張！
余絲韻