本文重點
中國神華（01088）喺澳洲新南威爾士州西北部買咗6塊農田成為農場主，大家都i晒頭，唔明煤炭商點解走去務農。內地有篇報道就話，神華呢個舉動與九十年代一本內地好流行嘅小說《我的財富在澳洲》嘅情節有異曲同工之妙，呢本小說內容主要係寫中國留學生喺澳洲嘅艱辛奮鬥史以及佢想喺當地實現嘅理想，佢雖然好高學歷，但都要由好低賤嘅工作做起，呢本小說詳細內容其實絲絲都未睇過，淨係知喺九一年出版，依家內地市面上幾乎都無得賣，要上網訂購至有，但睇書評好似結局都唔係咁開心。
獲附近煤礦勘探權
不過家陣時代唔同晒，中國企業「走出去」同中國留學生行出去，都有大把銀紙傍住，唔似以前屬於一個第三世界窮國家咁慘情，又要咁受氣。絲絲又諗番神華呢單嘢，亦深信個結局會係Happy end，事關神華買呢個農場只係附加禮物，佢已經攞咗農場附近嘅煤礦勘探權，咁可以保證順利探礦嘅同時，又可經營吓畜牧業增值，一舉兩得。
余絲韻