本文重點
新世界百貨（00825）早排宣布話要革新品牌，除咗改公司標誌，佢哋仲話要喺內地招募形象代言人。新百貨嚟緊會喺旗下三十幾間內地分店舉行初選，再分5個區域做區域預選賽，最後就喺北京舉行總選，最終會選出一男一女，兩位得獎者可瓜分總值超過60萬元人民幣嘅獎金獎品，同埋贏得一年合約。
VIP先可以參選
呢個活動過兩日接受報名，九月開始分區選拔，總決賽明年五月於北京舉行，成個過程連同報名歷時近一年，相信可吸引內地唔少傳媒報道，等同免費宣傳，新百貨執行董事兼彤叔乖孫鄭志剛都幾好諗頭。
不過，絲絲發現參加新百貨代言人招募嘅必須為新百貨嘅VIP，而新百貨喺內地一向走高檔路線，做得VIP嘅都係有高消費力嘅一群，唔知對佢哋嚟講，上述嘅獎金獎品又夠唔夠吸引呢？
余絲韻