Talk騷爆場「江湖救急」

絲絲近日同恒豐證券董事長張華峰、恒豐證券研究董事林家亨、富昌證券總經理藺常念及信誠證券基金經理王海翔喺中環歎下午茶，絲絲一邊食奶醬多，一邊聽佢哋分享對股票嘅睇法，齊齊研究買唔買得過，之後王海翔又教張老闆玩窩輪同牛熊證嘅竅門。人哋話「知識就是財富」，但絲絲見到佢哋毫不吝嗇自己嘅知識，反而互相袋錢落對方嘅袋，就係有錢齊齊搵。

研究完投資秘笈後，藺常念同王海翔就以香港專業財經分析及評論家協會嘅會長同理事身份，去銅鑼灣講投資Talk，由於當晚聽Talk人數突然增多，藺會長就急Call同屬呢個會嘅耀才證券市務總監郭思治到場。轉眼間郭Sir就以一身運動Look出現，佢仲話：「本來我喺屋企做緊運動，一收到會長電話就即刻出門，連衫都無換。」郭Sir呢種江湖救急嘅行為，真係值得後輩學習。

絲絲仲收到風，原來佢哋平時除咗搞免費講座，仲會約埋其他專業會員（全部係大家熟悉嘅財金專家）一齊去遊船河、行山、BBQ、打籃球同打網球，真係估唔到佢哋私底下咁鬼Friend。

余絲韻