大市殺上19,800點，熱錢有熱錢流入，鑊鏟友繼續入市搏殺。經過連日急升，昨日雖然指數錄得幾好升幅，但唔少股仔又開晒慢車，幸好市場仍有個別新星愈炒愈起勁，古晨覺得炒到呢啲水位，應該要轉趨小心，正所謂「小心駛得萬年船」。
雖然股仔表現只係一般，但鑊鏟友又點會無嘢炒，內房股靜局咗一輪，昨日下午又一齊開始發功，內地房地產價接連上升，加上大量熱錢流入炒股炒樓，未來樓價仲可以看好，碧桂園（02007）在今次升浪中算落後，本身手上土儲甚豐，隨着樓價上升，每股資產淨值增值唔少，近期股價回落明顯有收貨現象，昨午開始炒上，見成交急增，有勢值得追入，在憧憬業績下，可見5元，止蝕位可以放喺3.3元。
古晨